ലോക ടെന്നീസിലെ സ്വന്തം കരിയർ സ്ലാം അവസാനിപ്പിച്ച് സാനിയ മിർസ. ഓസ്ട്രേലിയൻ ഓപ്പണിൽ തുടങ്ങി അതേ കോർട്ടിൽ തന്നെ ഗ്രാൻഡ്സ്ലാം കരിയർ അവസാനിപ്പിക്കുകയാണ് സാനിയ. കായിക ജീവിതത്തിൻ്റെ പൂർണവിരാമത്തിന് ഇനി ദുബൈയിലെ WTA ടൂർണമെൻ്റ് കൂടി ബാക്കിയുണ്ട്. രോഹൻ ബോപ്പണ്ണയ്ക്കൊപ്പമുള്ള ഫൈനൽ പോരാട്ടത്തിൽ ലൂയിസ സ്റ്റെഫാനിയോടും റാഫേൽ മറ്റോസിനോടും പരാജയം ഏറ്റുവാങ്ങിയാണ് പടിയിറക്കമെങ്കിലും ഹാര്‍ഡ് കോര്‍ട്ടിലും ഗ്രാസിലും ഉയര്‍ന്നുകേട്ട ഈ ഇടിമു‍ഴക്കത്തിൻ്റെ പേര് ഒരു ഇന്ത്യൻ പൗരനും മറക്കാനിടയില്ല. കരഞ്ഞുകൊണ്ടാണ് സാനിയ പടിയിറങ്ങുന്നത്. ഈ കണ്ണീർ ദു:ഖത്തിൻ്റെതല്ല, സന്തോഷത്തിൻ്റേതാണ്. ഇവിടെയാണ് തുടങ്ങിയത്. അവസാനിപ്പിക്കാനും ഇതിലും മികച്ച മറ്റൊരു വേദി ഇല്ലെന്ന് പറഞ്ഞുകൊണ്ട്
മെൽബണിലെ റോഡ് ലേവർ അരീനയിൽ വെച്ച് വികാരഭരിതമായ ഫെയർവെൽ സ്പീച്ച്. ടെന്നീസിന്റെ ഇന്ത്യൻ അംബാസഡർ ആയിരുന്നു സാനിയ മിർസ. ടെലിവിഷനിൽ സാനിയൻ റാക്കറ്റിൽ നിന്നുതിർന്ന സ്മാഷുകൾ കണ്ട് ഇന്ത്യൻ അച്ഛനമ്മമാർ പെൺകുട്ടികളെ ടെന്നീസ് പഠിക്കാൻ വിട്ടു. ടെന്നീസിൻ്റെ ഇന്ത്യൻ ജാതകം കുറിച്ചു. കരിയറിന്റെ തുടക്കം തൊട്ട് തന്നെ ഇന്ത്യൻ യാഥാസ്ഥിതിക പൊതുബോധം സാനിയയുടെ നേരെ തുറിച്ചു നോക്കുകയായിരുന്നു. ഷോയബ് മാലിക്കുമായുള്ള വിവാഹവാർത്തയിൽ പല്ലുകടിച്ചു. സെറ്റിലാകണ്ടേ എന്ന അസൂയച്ചോദ്യമുയർത്തി പുറകെ കൂടി. എന്നാൽ ഇന്ത്യൻ പത്രത്തിൻ്റെ സ്പോർട്സ് പേജ് പിടിച്ചുവാങ്ങിയായിരുന്നു സാനിയയുടെ മറുപടി.
ഡബിൾസിലും മിക്സഡ് ഡബിൾസിലുമായി ആകെ 6 ഗ്രാൻസ്ലാം കിരീടങ്ങൾ സാനിയയുടെ കരിയർ ബുക്കിലുണ്ട്. കരിയറിന് പൂർണവിരാമമിടുന്നതിന് മുമ്പ് അടുത്ത മാസം ദുബൈയിൽ നടക്കുന്ന WTA ടൂർണമെൻ്റിൽ കൂടി സാനിയ പങ്കെടുക്കും.
