സുകേഷ് ചന്ദ്രശേഖറിന്റെ 200 കോടി രൂപയുടെ സാമ്പത്തിക തട്ടിപ്പുമായി ബന്ധപ്പെട്ട് ബോളിവുഡ് നടി നോറ ഫത്തേഹിയെ ഡല്‍ഹി പൊലീസ് ചോദ്യം ചെയ്തു. ചോദ്യം ചെയ്യല്‍ നാലുമണിക്കൂര്‍ നീണ്ടു. ഡല്‍ഹി പൊലീസിന്റെ സാമ്പത്തിക കുറ്റകൃത്യ വിഭാഗമാണ് നോറയെ ചോദ്യം ചെയ്തത്.
സാമ്പത്തിക തട്ടിപ്പുമായി ബന്ധപ്പെട്ട് നോറയെയും സുകേഷിനെയും എന്‍ഫോഴ്‌സ്‌മെന്റ് ഡയറക്ടറേറ്റ്(ഇ.ഡി)നേരത്തേ ഒരുമിച്ച് ചോദ്യം ചെയ്തിരുന്നു. ഇപ്പോള്‍ ചോദ്യം ചെയ്തതും ഇ.ഡിയുടെ കുറ്റപത്രത്തിന്റെ ഭാഗമായാണ്. 2017 ല്‍ അറസ്റ്റിലായ സുകേഷ് നിലവില്‍ ഡല്‍ഹി രോഹിണി ജയിലിലാണ്.
അതേസമയം, 2020 ഡിസംബര്‍ 12നു മുമ്പ് സുകേഷുമായി ഫോണില്‍ സംസാരിച്ചുവെന്ന കാര്യം നോറ ഫത്തേഹി നിഷേധിച്ചു. തട്ടിപ്പു നടത്തിയതിന്റെ രണ്ടാഴ്ച മുമ്പ് നോറയുമായി സംസാരിച്ചുവെന്നാണ് സുകേഷ് മൊഴി നല്‍കിയത്.
